నాటు కోడి షోరువా వండటం తెలుగులో

నాటు కోడి షోరువా వండటం తెలుగులో 

కావలసిన పదార్థాలు:

చికెన్: 750 గ్రా
మిరప్పొడి: మూడు టీ స్పూన్లు(కారంగా ఇష్టపడేవాళ్లు మరింత వేసుకోవచ్చు)
పసుపు: ఒక టీ స్పూను
అల్లం వెల్లుల్లి పేస్టు: ఒక్కొక్కటి మూడు టేబుల్ స్పూన్ల చొప్పున(కడిగిన చికెన్ ముక్కలకు అల్లం వెల్లుల్లి పేస్టు, పసుపు, మిరప్పొడి పట్టించి పక్కన ఉంచాలి)
నూనె: నాలుగు టేబుల్ స్పూన్లు
కరివేపాకు: రెండు రెమ్మలు
సన్నగా తరిగిన ఉల్లిపాయ ముక్కలు: 100 గ్రా
కాశ్మీరీ మిరప్పొడి: రెండు టీ స్పూన్లు
మసాలా పౌడర్: 4 స్పూన్లు
ఉప్పు: తగినంత
కొత్తిమీర: గుప్పెడు(సన్నగా తరగాలి)

తయారీ:

నాన్స్టిక్ పాన్లో నూనె వేడి చేసి కరివేపాకు, ఉల్లిపాయలు వేసి వేయించాలి. ఉల్లిపాయలు ఎర్రగా వేగిన తరవాత అల్లం వెల్లుల్లి పేస్టు, పసుపు, మిరప్పొడి పట్టించి ఉంచిన చికెన్ మిశ్రమాన్ని వేసి సన్నమంట మీద వేగనివ్వాలి. ముక్కల్లో ఎరుపుదనం పోయి నీరు వెలువడడం మొదలయ్యాక మసాలా పౌడర్, కాశ్మీరీ చిల్లీ పౌడర్ కలిపి కొద్ది సేపు మగ్గనివ్వాలి. ఇప్పుడు ఒకటిన్నర కప్పు నీటిని పోసి పది నిమిషాల సేపు సన్నమంట మీద ఉడికించాలి. మధ్యలో మూడు నిమిషాలకొకసారి కలిపి మూత పెడుతుండాలి. ఉప్పు, కొత్తిమీర వేసి సమంగా పట్టేటట్లు కలిపి దించాలి. ఇది అన్నం, గారెలలోకి బాగుంటుంది.

మసాలా పౌడర్ తయారీ:

ఆరు స్పూన్ల ధనియాలు, పది లవంగాలు, ఎనిమిది ఏలకులు, దాల్చినచెక్క, రెండు అంగుళాల ముక్క, స్టార్ లవంగం ఒకటి, పాపీసీడ్స్ రెండు టీ స్పూన్లు తీసుకుని పొడిచేయాలి.